تصحيح

الطريق لقلب الراجل معدته

معلومه صحيحه

لكن

يقصد ايه بكلمه "قلب"

القلب اللى بينبض

وللا

القلب بمعنى

الدلق؟؟؟؟؟؟؟؟؟

كلام الحب

كل كلام الحب عشانك

حتى سكوتى بينطق بيه

كل مكان فى القلب مكانك

تملكى دمى النابض فيه

كل افراح الدنيا عيونك

حتى الفرح ال مستنيه

كل الحان الغنا الحانك

واسمك لحنى اللى بغنيه

كل غنايا من احزانك

حتى الشعر اللى مخبيه

كل دموع البعد عشانك

وقربك املى وعايش بيه

.

س ج م

http://hmommasr.blogspot.com/

موضوع جديد على هموم مصريه

حبيب القلب

حبيب القلب

ياللى القلب من جوه

بيرتاحلك

يا اجمل حب

ياللى الحب انا وهو

بنندهلك

يانور العين

لو رحت فين انا وقلبى

بنشتاقلك

يادوا روحى

وبلسم شافى لجروحى

لو اسمعلك

يافرح العمر

راح اغلى العمر

من قبلك

.

الف حكايه

بينى وبينك الف حكايه

بينى وبينك بحر مشاعر

كل كلام الحب معايا

كل ما أحبك اصبح شاعر

انطق اسمك حتى فى سرى

يطلع احلى كلام غنوايا

حتى الفرشه بتجرى فى ايدى

ترسم قلبك ورده وعينك نجمايا

اسألى فرع الشجره فى بيتنا

محفور اسمك جوه خلايا

بينى وبينك حب كبير

بينى وبينك سر فى بير

بينى وبينك الف حكايه

اجمل تفاصيلها جوايا

.

الامل

ارسمونى فى الكراسات

هتلاقونى دوامات

تدور فى كل الاتجاهات

ارسمونى مركب ورق

جوه بحر كبير

وريح شديد

بس بتقاوم الغرق

ارسمونى شباك مفتوح

فى ليل عتمه

مستنى بكره اللى لازم ييجى

الشمس فين هتروح!!

ارسمونى حبه

فى بطن الارض مرميه

ماحدش يقول ماتت

بعد ماتشرب حبة ميه

تطلع من الارض رافعه ايديها للسما

عود اخضر واوراق نديه

ارسمونى فى القلوب

جنه خضرا

ارسمونى على الوشوش

بسمه ظاهره

ارسمونى وارسمونى

ولو غبت

فى كل بكره

استنونى

.

بنقول فراق

على فين تروحى

يامالكه روحى

وانتى اللى بعدك

اصعب جروحى

ازاى تغيبى

وقلبك حبيبى

وانتى اللى حبك

جرحى وطبيبى

بنقول وداع

وعمر ضاع

وبكره كدبه

واكبر خداع

والقلب جوه

عامل فتوه

ولا هامه جرحه

ولا حلم تاه

بيقول هينسى

ويمكن يقسى

ويقدر يبيع

قلب اشتراه

.

لسعات خفيفه (2)

ممكن نبعد عن ناس عايشين معانا
لكن صعب نبعد عن ناس عايشين جوانا

الغيره - من رباعياتى

ياما شفت حبيب محتار باينه فى عنيه الحيره
وعيون بتطق شرار بتحكى فى الحب سيره
وعيون سهرانه وقلوب حيرانه ودموع ولهانه
انا قلت الحب عذاب قالولى كفايه الغيره

بحبك فوق ماتتصورى

بحبك فوق ماتتصورى
واكتر من خيالك
بحبك لو هتتغيرى
او لسه فى مكانك
بحبك كلمه ماتقالتش
بقلبك انتى سامعاها
بحبك نظره مخطوفه
محفوظه صورتك جواها
بحبك لمسه ممنوعه
بكل كيانى اتمناها
بحبك همسه موجوعه
من اشواق شايلاها
بحبك كلمه مهجوره
اوعى تكونى ناسياها


اعتذار
معلش مش قادر ارد على تعليقات
او ازور حد لانى مسافر

بتوحشينى

مش عايز امشى
ولا رجلى مطاوعانى
مش قادر اسكت
والكلمه على لسانى
اللى شفته فى عيونك
هزنى وزلزل كيانى
حسيت من دفا وداعك
باديك محاوطانى
ولقيتك بتوحشينى
وانا لسه فى مكانى
وفضلت اقولك بحبك
وانتى مش سامعانى

من تخاريفى القديمه