طق حنك مش اكتر

السبت، مارس 13، 2010

استماره بخمسه وسبعين

انا استماره بطاقه رقم قومى بس من الغالى بخمسه وسبعين جنيه لونى اخضر...قصتى بتبتدى من اول ماكنت ورقه ماسواش شلن بقدرة

قادر بقيت اساوى كتير طالعه من المطبعه فرحانه بلونى الاخضر وبتمنى الغالى بس كل ده مش مهم انا قصة حياتى القصيره بتبتدى لما حد

يشترينى ويحررنى من حبسة الخزنه وريحة الفلوس القديمهواخيرا انفتح باب الخزنه وجه دورى اخيرا الحريه ومع اول ضوء دخل الفضول

غلبنى اشوف مين هيشترينى...ودى كانت أول صدمه..اصل اللى كان فى خيالى ان كل اللى بيشترى استماره بخمسه وسبعين غنى وظروفه

مرتاحه لكن الواقع غير كده خالص اغلب اللى بيشترى استماره ب75 غلابه وعلى قد حالهم زى صابرطبعا اكيد عرفتوا مين صابر...شاب

اسمر مش مهم شكله لانه واحد من ملايين يمكن يكون جارك او اخوك اوصديقك هو شبههم وشبهك والهم اللى شايله زى همهم وهمك ..لكن

رغم انى كنت اتمنى يشترينى حد غيره ظروفه احسن لكن ماعرفش ليه تعاطفت معاه وتمنيت اسعده لما اتحول من استماره لبطاقه واصبح

كل همى هو صابر..مسكنى صابر بايده وعينه بتلقى بنظرة وداع على الخمسه وسبعين جنيه اللى اختفت فى الخزنه الضلمهماحدش عارف

هى رايحه فين حتى الموظف اللى اخدها من صابر مايعرفش مصيرها وماحدش بيقول ويمكن ماحدش سأل..مسك صابر قلمه وبدأ يكتب

بياناته بحرص شديد كأنه فى لجنة امتحان اسئلته السهله جدا خايف يجاوب عليها.رغم ان السؤال هو اسمك لكن القلم خايف يجاوب خايف

يكتب خانه غلط تبوظ الاستماره وتضيع الفلوس ..ما اصعبه امتحان.. لكن صابر طول عمره مجتهد وذكى ومتفوق موس مذاكره زى

مابيقولوا ومعاه شهاده عاليه. بدا يكتب اسمه صابر واسم ابوه راضى جنسيته مصرى تاريخ ميلاده لسه فى عز شبابه عود اخضر طاقه

منتجه عنوانه جيراننا . طبعا الحاله الاجتماعيه اعزب... اما المهنه هى اللى حيرتنى عايز يكتب عامل اجرى !! والله صعبان على يا صابر

وصعبان علي تعبك وسهرك الليالى فى المذاكره ودعوات اهلك بالنجاح عملتلك ايه الشهاده اخرتها عامل اجرى! بس كله يهون علشان لقمة

العيش .خلاص صابر كتب كل البيانات المطلوبه بدقه بس اللى محيرنى لغاية دلوقتى نظرة صابر مش مبسوط بس مش زعلان. ماعندوش

امل بس مش يائس باختصار تقدروا تقولوا عليه صابربس مش راضىاصل صابر عقبال عندكم جميعا جايله عقد عمل فى دوله عربيه

يشتغل عامل اجرى وباع اللى وراه واللى قدامه علشان يجيب العقد.... بس هو كان نفسه يشتغل فى بلده بفلوس قليله مش مشكله بس يشتغل

المهنه اللى بيحبها واللى علشانها ذاكر وتعب واخد بكالوريوس التربيه كان نفسه يشتغل مدرس تاريخالطابور طويل الدنيا حر واخيرا وصل

صابر للموظف اللى استلم منه الاستماره حسيت ان دى لحظة الفراق هتبتدى رحلتى بس من غير صابر بس اللى مصبرنى ان صابر وهو

ماشى اخد حته منى مكتوب عليها ايصال استلام لسه فيه حاجه بتربطنى بيه ...مشى صابر والموظف حطنى وسط كوم استمارات كلهم

اعرفهم كنا مع بعض فى خزنه واحده تقريبا كلنا دفعه واحده شبه بعض بس اختلفنا لما باعونا كل واحده مننا شايله هم غير اختها وبيانات

مختلفه الشبه الوحيد اللى فاضل بيننا ان كلنا محبطين من اللى شوفناه كلنا صعبان علينا اللى اشترانا كلنا بنتمنى نتحول بطاقه باقصى سرعه

وده حقنا لاننا استمارات مستعجله ...بس مستعجله على ايه....ده اول تعليق سمعته من اول موظف مسك مجموعة الاستمارات وقال لزميله

خد دى استمارات مستعجله هو قالها على انها دعابه بس احنا مستعجلين على مصالح اصحابنا ومهمومين بهمهم تعرف ياصابر كان

المفروض يسمونا استمارات مهمه لان اسم مستعجله مش بيثير اهتمام الموظف لان احنا فعلا استمارات مهمه.. مصير ناس كتير متعلق بينا

تعرف كمان المفروض يسمونا استمارات غاليه لان تمنا غالى جدا بالنسبه للفئه اللى بتشتريناتمنا بيمثل ثروه بالنسبه للغلابه اللى زى

حالاتك....انت تعرف رغم كل ده بيسمونا ايه ؟ استمارات خضرا...... احنا المفروض نطالب بتغيير اسمنا يسمونا استماره مهمه مستعجله

غاليه مهمومه

.

هناك 15 تعليقًا:

لاسع افندى يقول...

القصه دى سبق نشرها على مدونة هموم مصريه ومن زمان بفكر انشرها هنا يمكن لان تخاريف حظها افضل فى الزياره

اتمنى القصه تعجبكم

إيمان يقول...

قصه كل شباب اليومين دول
وحلم الحصول على الاستمارات
سواء عقد عمل سواء تقديم وظيفه
سواء رقم قومى
وكله بتمنه وادفع ياصابر
وصابر صابر وراضى وبيجاهد علشان لقمه العيش زى ماقولت
قصه واقعيه وحزينه من قسوتها
تحياتى

♥نبع الغرام♥♪≈ يقول...

اهلين صابر ولا كذااااااا

طبعا المشكله كلها فى الشاب الا درس وكان يتمنى يعيش بوطنه وميهنش نفسه
فى بلاد الغربه
لكن للأسف ان كان الشاب مش لاقى الامان فى وطنه يبقى ينسى الامان فى بلاد غيره
ومعلش الصبر مر لكن ربنا بيكافىء
وربنا يرزق جميع شباب المسلمين

Tears يقول...

السؤال اللى بيطرح نفسه...هو صابر ح يفضل صابر كده على طول؟ يعنى اتولد صابر و ح يعيش و يموت صابر؟

طيب و كده ايه فايدة الصبر و هل اصلا ده فعلا اسمه صبر و لا حاجة تانية؟


تحياتى لصابر

Ms Venus يقول...

جميلة اوى

بجد جميلة

شوفتها قدامى صورة بتتحرك

وشوفت صابر وعرفته

لانى بشوفه حواليا كتير

بشوفه فى وش كل شاب مصرى عايش وشايل الهم

صابر على الحال بس مش راضى عنه

لازم يتغير لازم

لان مصر كده بقت فعلا بتحتضر

just waiting يقول...

لو معندكش صبر صابر خلي عندك صبر ايوب يا اما ماتعيش في مصر
بس لأمتى بقى احنا تعبنا قوي وملينا
تحياتي ليك القصة بجد بتنقل الواقع المر الي احنا عايشينه

إمرأه من ثلج يقول...

مفروض نسمى الشعب المصرى

الشعب الصابر
تلت تربى الشعب المصرى نسخة مكررة من صابر

تعب وسهر واهلة دفعوا الى وراهم ولى قدمهم علشان فى الاخر ياخد شهادة يعلقها فى الصالون
ويشتغل شغلانة تانية خالص بعيد عن الى تعلمة

دى لو لقا شغل اصلا


تحياتى
ارجو ان تقبل مرورى

Tarkieb يقول...

ياريت تصغر الخط شوية الكلام سايح على بعضه انا باستعرب الناس قريته أزاي

sony2000 يقول...

الصبر اصلا هيمشي من كتر الصبر اللي عندنا
صابرييييين لاخر مدي
هو ايه اقدامنا غير الصبر

ستيتة يقول...

اجمل شيء فيها
ان اللي اشتراها صابر
ويا مكتر الصابرين فيكي يا مصر
حلوة يا لاسع

صوت من مصر يقول...

مش عارف اقولك ايه

mony يقول...

وقال ايه
يامستعجل عطلك الله
شوف بقى بعد كوووووووووول ده
ومستعجله ومهمه وغاليه
ال ايه
ممكن الاوراق تكون ناقصه ختم وللا اقرار وللاايصال نور
وفى الاخر تتعطل
ونعيد الكره ونقف فى الطابور تااااااااااانى
ربنا يخليلنا النظام والطوابير فى مصر المحروسه

rony يقول...

كلنا صابر

يا عيييييييييييييييينى علينا


طبعا انت يا لاسع عمرك مادفعت حتى
تمن الاستماره اللى ب 15 جنيه
مش اللى بخمسه وسبعين
صح وللا مش صح

طوبه فضه وطوبه دهب يقول...

عايزه اقولك ان القصه دى بتحمل معانى وهموم فئه كامله لا يمكن تجاهله ولكن يكفينا البكاء عليها تسلم ايدك

Unknown يقول...


شركة تنظيف فلل بالقطيف
شركة تنظيف شقق بالقطيف
شركة تنظيف مجالس بالقطيف
شركة تنظيف موكيت بالقطيف
شركة تنظيف سجاد بالقطيف