طق حنك مش اكتر

الأحد، أغسطس 30، 2009

خلاص جرحت


خلاص ارتحت
جيت وجرحت
طب كنت استنى
اتفرج
شوف الم الجرح
دى الفرجه كانت ببلاش
والدم كان للركب
والدمع على خدى كتب
حبك ليا
ابسط طلب
وجرحك ليا
مالوش سبب
انا طلبى امان
وحضن حنان
وقلب ناسى
جروح زمان

الجمعة، أغسطس 28، 2009

ماتظلمينيش


ماتظلمينيش
لازم نخسر قلوب
علشان قلو ب تانيه
تعيش
لازم نقفل صفحات
وصفحات
ماتتمحيش
لازم ننسى ذكريات
وذكريات
ماتتنسيش
وكفايه نبض قلبى
من غيرك مش هيعيش
وكفايه لما سبتك
قلبك ماكرهنيش
كفايه عليا عذابى
لما اقولك بحبك
وانتى ماتسمعيش
.

الاثنين، أغسطس 24، 2009

راجع ليه

راجع ليه
بعد ماضاق
الكون حواليه
بعد مالف ودار ودور
راجع بعد ماقلبى تغير
راجع يحفر ع المدفون
راجع واثق زى ما سابه
زمان مركون
على نفس الرف يلاقيه
راجع ليا ولا ليه
فاكر يعنى لما ينادى
هرد عليه
فاكر لما بطرف صباعه
يشاور
هترمى فى ايديه
راجع فاكر لسه
فى قلبى مكان
يجرح فيه!!!!!
.

الثلاثاء، أغسطس 18، 2009

صاحبت صحاب كتير..مافضلش منهم صاحب
ضحيت بغالى ورخيص..وبرضه مش عاجب
اشتريت وانا متباع .......فاكرهم واتنست
صحيح الخل الوفى ... يتعد من العجايب

الاثنين، أغسطس 17، 2009

الصاحب - من رباعياتى


صاحبت صحاب كتير..مافضلش منهم صاحب

ضحيت بغالى ورخيص..وبرضه مش عاجب

اشتريت وانا متباع .......فاكرهم واتنست

صحيح الخل الوفى ... يتعد من العجايب

السبت، أغسطس 15، 2009

قلب خالى - من رباعياتى


نزلت سوق القلوب اشوفلى قلب خالى
لاعمره داق الجرح ولا سهر ليالى
يكون من جوه ابيض ماعرفش الكراهيه
قالولى مش بنبيعه لان تمنه غالى
.

الثلاثاء، أغسطس 11، 2009

بحبك من تانى


بحبك من تانى

نفس حبى الاولانى

بس يمكن بشكل تانى

الفرق بينهم

انا بطلت اكون انانى

خلاص عرفت

الجم لسانى

واقول بحبك

من غير صوت

واسمع فى صمتك

احلى الاغانى

قدرت اخدك

واطير واطير

وانا فى مكانى

قدرت اهرب

من زمانى

ماتسأليش

عن الامانى

خلاص سلمت للمستحيل

ومش عايز اعرف

مين الجانى

ولا عايز اسمع

حكم تانى

السبت، أغسطس 08، 2009

الموج - من رباعياتى


ياموج بيتسابق على شط فيه موتك

ارجع لبحرغميق عيش فى ملكوتك

ارحل لقلب المحيط اهرب من المكتوب

قال هاحضن الرمله مهما على صوتك

الأربعاء، أغسطس 05، 2009

نلتقى بعد الفاصل


عدنا
وعاد الحنين
وكأن البعد
وفراق السنين
فقره اعلانيه
حاولت اتسوق
حبا اخر
قلبا اخر
اتسوق كلمات
لم يعرفها المحبين
اشترى نظرات
لم المحها من قبل
فى عيون العاشقين
ابحث فى تاريخ العشق
اجمع اشواق السابقين
انتهى الفاصل
لم اجد سوى كلماتى
لم اشترى الا نظراتى
لايوجد حبا اخر
يمكن ان يملك حياتى

الأحد، أغسطس 02، 2009

الحقيقه - من رباعياتى



الظالم بيكرهنى ولايوم تجمعنا طريقه

يخاف منى الكداب خوفه من الحريقه

شروقى بعد الضلام ينجى كل برىء

فى شهادة ميلادى مكتوب اسمى الحقيقه