طق حنك مش اكتر

الخميس، يوليو 30، 2009

الحقيقه


سؤال من عاشقة الاحزان ........اذكر10حقائق

ولان الاجابه صعبه جدا...وناس كتير عاشت

وماتت بتدرو على الحقيقه وما وصلتش

والغش حوالينا فى كل مكان...تعالوا مع بعض ندور على الحقيقه


فيه حقيقه بننكرها..........

وحقيقه بنكرهها..........

حقيقه بتجرحنا..........

وحقيقه تفرحنا.........

حقيقه جوهرها سراب...........

وحقيقه جواها عذاب.........

حقيقه تلاقيها فى كتاب.........

وحقيقه تشوفها.........

فى عيون الاصحاب........

الله حقيقه

الوجود حقيقه

الموت حقيقه

الحب حقيقه

الكره حريقه
.

الثلاثاء، يوليو 28، 2009

لسعات خفيفه (1)


الحب يمكن ان يدفن...لكنه لايموت

عشاق الليل


سهرانين

سايبين النوم لاهله

والسهر هديه

للى يستاهله

عاشقين نجوم الليل

مع صوت غنا المواويل

والقمر يندهله

فى كل مسا ياجميل

اقولك ..تسهر على خير

تقولى ...وانت من اهله


.

الأحد، يوليو 26، 2009

يااااااااحمار*****ياااااااااااكلب




يااااااااحمار*****ياااااااااااكلب
ضغطى ارتفع من واحده غبيه النهارده..بس مش قادره اقول عليها حماره...ليه بقى
لانى اصلا بستغبى اللى بيقول على البنى ادم الغبى ...حمار
ليه بقى
لان الحمار اذكى تالت حيوان
تصوروا العربيه الكارو اللى بيشدها حمار صاحبها وهو رايح السوق بيبقى نايم على العربيه جنب الخضار والفاكهه
وسايب الحمار "الغبى" يسوق العربيه من شمال البلد الى جنوبها ويعدى طرق وبين العربيات ..وووووووووووو
ده كله لوحده والعربجى نااااااااااااايم لانه عارف انه مش هيتوه ليه بقى؟؟؟؟؟؟؟؟؟؟
عشان عارف ان الحمار مش غبى ده اللى بيشتم الغبى هو الغبى
وللا يعينى على الكلب
اللى بيشتم البنى ادم الخاين بيقوله يا "ياكلب"
طيب ده مفروض الكلب وفى وكل البشر فى كل الدنيا بيقولوا على الكلب انه وفى...تعالى نشوف لو عندك كلب وحصلك
حاجه..خلتك نايم فتره فى السرير .هتلاقيه تحت رجليك
ولو مدربه مثلا ممكن يروح يطلبلك نجده من الجيران....لو مدربه يعنى....شوف بقى لو ماشى فى الشارع وحد هجم عليك يضربك هتلاقيه لحقك قبل البوليس الشاطر بتاعنا.
صاحبتى كان عند بباها كلب وجه بباها مات
عارفين...الكلب بتاعه مات بعده باسبوع بعد ما قعد الاسبوع ده مش بياكل.
ومواقف كتير مش هقدر احكيها هنا
بااااااااااااااااااااااى

الجمعة، يوليو 24، 2009

اهداء الى قلبها


قلب العاشق دليله

وانا قلبى حس بيه

شايف دموع قلبك

وجرحه اللى مخبيه

ساكت صامد وصابر

والحيره ساكنه فيه

سامع صمتك بيصرخ

يقول انا ذنبى ايه

نفسه يكمل طريقه

وقلبك مش ملك ليه

امله ترحل مراكبه

فى بحر بكره اللى مستنيه

نفسه يصبح يلاقى

الحيره مش بتلاقيه

يتمنى يبص فى قلبه

مايشوفش قلبك فيه




الأربعاء، يوليو 22، 2009

خليه يعيش


سيبه يعيش

ادعيله يفرح

بلاش تكون

انت المه

او ايد بتجرح

بلاش يحس بحبك

او يلاقيك

فى كل مطرح

سيبه ينسى حنانك

قول لقلبه

الماضى روح

شيل عيونك من طريقه

بلاش تقول الشعر فيه

سيب ضميره يستريح

ولا يحس اللى انت فيه

.

الأحد، يوليو 19، 2009

استحاله

ارجع تانى
لنفس الحاله
واعيد الجرح
ارجع اسهر
اكتب رساله
واستنى الفرح
ازرع شجرة بكره
فى قلبى
واتمنى الطرح
تطرح شوك
والورد لغيرى
يروح فى رساله
.

الأربعاء، يوليو 15، 2009

انا والقمر - من رباعياتى


انا والقمر صحاب من زمان باشكيله الهموم

استنى كل شهر لكنه مش بيدوم

على مهلك ياقمر خليك شويه

قالى ...الغالى يرخص لو يطلع كل يوم

الأحد، يوليو 12، 2009

مش باقى منى - النسخه الصينى

video

مش باقى منى ..غير شهاده ورق

مكتوب حروفها بالكفاح والعرق

كان جوه منها حلم عمر اتسرق

وانا فى طابور الشغل

عمرى كله مرق

مش باقى منى....غير شهاده مكتوبه

كبيره وعاليه لكن مش مطلوبه

تعب السنين اتحول

حبر على ورق

.........

مش باقى منى غير جواز سفر

قلبه ابيض مستنى تأشيره

فى كل بلاد الدنيا

قابلوه بتكشيره

راضى بحكم القدر

مش خايف من الغرق

حالف يسافر

لو فى مركب ورق

الثلاثاء، يوليو 07، 2009

الصبر طيب

قلبى اصبح ضعيف
ودمع عينى قريب
والحق على طرف لسانى
لكن ماينطقهوش
الظالم يضرب اخويا
وايدى ماتحوشهوش
قالولى الظلم مر
انا قلت الصبر طيب

السبت، يوليو 04، 2009

ارانب ..ارانب

الارانب من فصيله القوارض
لاتمشى ولا تجرى
لكنها تنط على رجليها الخلفيه وهى اطول واقوى من الامامه
لما بتحس بخطر بتجرى بسرعه توصل ل 29 كيلو متر فى الساعه
بتدبدب برجليها الخلفيه لما بتحس بخطر وتحذر بعضها

بتتراوح مده حمل الانثى من 26 الى 30 يوم
لما بيتولدوا الصغار مش بيشوفوا ولا يسمعوا ومن غير فرو
بتحفر الام جحر وتجهزه لولادها الصغيريين
وبتقطع فروها بسنانها من جسمها عشان تفرشه تحت اطفالها
وبتولد حوالى 5 مرات فى حياتها
والمره الواحده بتولد من 5 الى8 ارانب
والارانب لحمها ابيض واليافه لينه وفيها كميه بسيطه جدا من الدهون
ومليان بروتين مغذى
ده غير طعمه الرائع
وفروه لما تعمله ميداليه ناعمه وللا محفظه جميله