طق حنك مش اكتر

الثلاثاء، يونيو 30، 2009

خايف من يوم وداعك


خايف من يوم وداعك

لما تشيلى سنينى

فى شنطة السفر

لما تاخدى القمر

وتسيبى ليل وسهر

ويبقى ليلى عتمه

من غير ضى القمر

خايف من يوم ضياعك

تاخدى كل اشعارى

ويفضل قلمى وحيد

يرفض يطاوعنى

ولا يكتب كلام جديد

ويبقى سطرى وحيد

والحرف بايعنى

خايف من يوم وداعك

المح فى عينك حنين

او دمعه من اوجاعك

ندمانه على السنين

تغطى فرحتك

وضحكتك

ويبان قلبك حزين

خايف على قلبك

مايكونش فيه قلبى

خايف على قلبى

مايكونش فيه قلبك

خايف على القلبين

يحنوا ليوم زمان

كانوا قلب واحد

مقسوم على جسمين
.
.

الأربعاء، يونيو 24، 2009

بلدى - من رباعياتى


طول عمرى احب بلدى واقول ماتحبنيش

طول عمرى اخد منها واقول مابتدنيش

رحلت وسبتها وهجيت رجعت ابوس ترابها

واقول كفايه سايبانى على ارضها اعيش

الثلاثاء، يونيو 23، 2009

السعاده - من رباعياتى


دخلت البنك اجيب سعاده مالقيتش الصنف ده

الطبيب ادانى صحه بس السعاده مش كده

الحظ ضحكلى بس مشفتش معاه سعاده

سألت عطار قديم ...ادانى حبة رضا !!

الاثنين، يونيو 15، 2009

لو ناوى تجرحنى


لو ناوى تجرحنى

حاسب من السكين

تجرح ايدين حلوين

جرحك ده يدبحنى

واموت لو اشوفك حزين

لو ناوى تقتلنى

خدنى فى مكان امين

بعيد عن العيون

ليشوفك اللايمين

لو ناوى تدفننى

سيبنى احفر بايدى

اخاف تراب السنين

وعرق الجبين

يلطخ قميصك الثمين

لو عايز تجرحنى تقتلنى تدبحنى
من غير نقطة دم

ابعدنى عنك يومين

السبت، يونيو 06، 2009

صور وجوابات


مش ان الاوان

نحرق الصور

ونقطع الجوابات

نخاصم السهر

ونقول على اللى فات

مات

مش ان الاوان نعترف

ونطلق سراح الاهات

مش عيب لما نندم

ولاعيب اننا نفهم

العيب لو صحينا

ولقينا

وقت الرجوع فات

الأربعاء، يونيو 03، 2009

شهاده مميكنه

ياصباح العكننه
عايزين شهاده مميكنه
هو انا بقدم فى الحربيه
ولا الثانويه الجويه
دى يدوبك كجى وان
ياوليه كفايه زن
اروح لمين واقول يامين
اكتب اذن ساعه
ولااعمل جواب تأمين؟
بص لى المدير بحنيه
وقال لو رايح الاحوال المدنيه
اسبوع اجازه شويه
ومتنساش السندوتشات والزمزميه
واسال مجرب ياعنيا
اول يوم توقف الطابور
تقدم طلبك لما يجى عليك الدور
تانى يوم نعيد الطابور
تاخد شهاده مش مظبوطه
اغلب كلماتها مغلوطه
الذكر عاملينه انثى
وطماطم كاتبينها اوطه
علشان تصحح انسى
دورلك على مخطوطه
فيها تاريخ الاسره
او روح محكمة الاسره
هات قسيمه جواز جدك
وشهادة تطعيم حماتك
والدبلوم من عمك
وتجنيد اخواتك
واحكى تاريخ حياتك
وارجع من تانى طابور
واستنى يجيلك الدور
هتلاقى الشعر الابيض
فوق راسك منشور
وابنك قرب يتخرج
وانت واقف فى طابور
ولا طوابير الجمعيه
ومخك اتلحس وبقيت مهلبيه
علشان كده عملوا الاحوال المدنيه
فى حى العباسيه