طق حنك مش اكتر

الأربعاء، ديسمبر 29، 2010

2011



وانا بستقبل سنه جديده

وبودع سنه قديمه

احب اقولك

حياتى من غيرك

ملهاش قيمه
.

الأربعاء، ديسمبر 22، 2010


مبرررررررررررررررروك


عاوزه اقول ل لاسع افندى


مبروك ياباشا على البنوته الجديده


تتربى فى عزك انت ومامتها

الخميس، ديسمبر 02، 2010

اجعل حبيبك يكرهك


اجعل من يحبك يكرهك جدا

طريقه سهله وسريعه..مش سريعه اوى

عاوزه شويه وقت بس فعاله

الاهمال ....الاهمال...الاهمال

*اهمله فى سؤالك عليه على قد ما تقدر

*اهمله فى عيد ميلاده ولو سألك ليه كده

قوله فيها ايه..نسيت ..وايه يعنى

*اهمله فى المناسبات الدينيه ولو عاتبك قوله

التليفون اتكسر..المحلات قافله..كنت عيان..الخ

*اهمله فى الذكريات اللى بينكم

*ماتحسسهوش انك بتحبه وبتغير عليه..على ان

الغيره مهمه للحب

*اذا مرت به مشكله فى شغله مثلا ..هيفها وتفه

مل ما يتعلق به

*لا تهتم بالاشياء الجميله فيه..


***النصايح دى للى عاوزين يخلعوا من حبهم

لكن اللى عاوز يتمسك بحبيبه خليه ياخد باله

من الحاجات الصغيره الحساسه

عشان


الحب يعيش

الجمعة، أكتوبر 22، 2010


ياااااااااااااااااااااااااااااااااااااااااا رب

السبت، أكتوبر 09، 2010

شفتى الفرحه؟


شفتى الفرحه الماليه عيونى

وانتى معايا ؟؟

اكيد شفتيها

اصل الفرحه اللى فى عيونك

كانت زييها

شفتى القلب اللى بتنطط

جوه ضلوعى ؟؟

كان بيغنى نفس الغنوه

البتحبيها

حتى شفايفى الكانت ساكته

انتى سمعتيها

قلت بحبك بس الرد

استكترتيها

.


الأربعاء، أغسطس 25، 2010

تداعيات ازمة الحشيش


بيدوروا عليها

زمان اللى سرقها لفها فى سيجارتين


.

الاثنين، يوليو 26، 2010

حبيب العمــــر


حبيب العمرخلى العمرليه معنى

بيحلى العمر لما الدنيا تجمعنا

جميل الحضن لما يساعنا

ونجرى نغسل فيه اوجاعنا

والقلب قبل الودن يسمعنا

حبيب العمر اخاف الدنيا تسرقنا

ويجرى العمر والايام تفرقنا

يطير الحزن بجناح حزين داكن

يرمى هموم تغرقنا

حبيب العمر تعال لحضن

يلملم كل اشواقنا

.

الخميس، يونيو 17، 2010

قــلب حبيبـــى


ياقلب حبيبى ايه مدارى

الحزن جواك متـــدارى

سيب قلبى ينور لك شمعه

وامسح من دموعك دمعه

ازاى اسيبك وحيد فى ليلك

وياما نورت ايامى

ازاى اسيبك غرقان فى همك

وانت جنة احلامى
.

الخميس، مايو 27، 2010

عيد ميلاد الليله ميييييين؟؟؟






عيد ميلاد لاسع جمييييييييييييل

احلى تورت ليك يا لاسع

وكل سنه وانت طيب
وعقبال مييييييييييييييييت سنه

واحلى بوكيه ورد هديه للاسع افندى


.

الجمعة، مايو 21، 2010

الصبر


ياصيادين الصبر

مش بالشبك يتصاد

الصبر عايز صبر

ويتلقى بالكاد

ده الصبر غلب القدر

لما بدأ العناد

.

السبت، مايو 08، 2010

الى زوجتى



الحمد لله انك معايا


.

الاثنين، أبريل 26، 2010

فضفضه


فضفضه



احبائى المدونين والمدونات

انا قولت افضفض معاكم شويه يمكن افضى الكبت والحيره اللى عندى

اصل انا قربت اطق واتجنن ومش عارفه ومش فاهمه حاجه فى اى حاجه

انا كنت عايزه اعرف هى الدنيا دى ماشيه ازاى؟

زمان اتعلمنا ان الصح صح والغلط غلط اما دلوقتى بقى ان الصح

بقى غلط والغلط بقى صح الصح

اكتشفت ان البنت تعرف تاخد قراراتها لوحدها وبدون مساعده من اى حد

اما الولد وده الغريب طبعا انه ميعرفش ياخد قرار واحد لوحده لي بقى؟؟؟؟

لان ماما هى اللى بتقول وبتعمل وبتاخد القرار هى اللى تقول ينفع او مينفعش

هى اللى تقول ياخد دى او ماياخدش دى يعمل ده ولا ميعملش

دى الرجوله دلوقتى .......... البنت لما بيلاقوها محترمه ومؤدبه

تحافظ على بيقولوا عليها بنت ب 100 راجل دلوقتى هيتقال عليها ايه؟

البنت دلوقتى بتاخد اهم قرارات فى حياتها وبتتحمل النتيجه مهما كانت

اما الولد بيخاف ياخد اى قرار احسن ماما تغضب او بابا وساعتها طبعا

هيتحرم من الميراث سوررررررررررى قصدى المصروف

اكتشفت كمان ان البنت لما تقف جنب خطيبها او جوزها فى بداية حياته وتشجعه

تبقى بتخطى اولى خطوات الفشل فى علاقتها بيه وهيفرط فيها بسهوله جدا

انا بنصح كل بنات جيلى واللى قبلى واللى بعدى كمان كل بنت اتربت تربيه صحيحه بقولهم

ينسوا كل اللى اتعلموه زمان لازم يعرفوا ان الزمن اتغير والمبادئ والقيم اتغيرت كل ماهو

صح زمان غلط جدا جدا دلوقتى احنا فى عصر جديد كله خدع ومفيش امان او امانه فى
التعامل بين الناس
حد يفهمنى ليه الام بتدخل فى حياة ابنها وكأنها بتعمل على سعادته وهناه زى طفل صغير
امتى الام هترفع الوصايه من على ابنها وتسيبه يتحمل مسئولية نفسه على الاقل؟؟؟؟؟؟
ليه يا امى بتربينى صح............ ليه خلتينى غريبه فى وسط الناس..............

حد يفهمنى ليه بيحصل كده فى الدنيا اللى بنفتكره حبيب بيطلع عدو لييييييييييييييييييييييييه؟؟؟
كل المعانى اتغيرت لييييييييييييييييييييييييييه؟؟؟؟؟؟؟؟؟؟؟؟







السبت، أبريل 17، 2010

المكتوب - من رباعياتى


مـديت ايـدى فى الـزمن اغـير المكتوب

لا طلت نجوم السما ولا اخرت الغروب

عـاندت يوم القـدر لقـيته نـــاشـــف حجر

مستنى ايه من بكره اللى بات ليله مغلوب

.

السبت، أبريل 10، 2010

بـحب لـمـا



بحب لما الم كلام الحب

اللــى مــالى عـيونــك

واحب اغزل دق القلب

لهفه وشوق يحاوطونك

واحب امارس طقوس جنونى

يزيد الحب فى جنونك

واحب منك نغم اسمى

يغطى الورد من لونك

واحب فصل الربيع

وشروق الشمس بجفونك

واحب حبك واحبك

واحب الناس اللى يحبونك

.

الأربعاء، أبريل 07، 2010

عودى ليعود الربيع


حبيبتى عودى قلبى لم يغلق بعد امامك

لم تطفىء الريح رغم قوتها لهيب نارك

لن يتغير قلبى رغم تقلب احوالك

كم شكوت اخطاء الاخرين امامك

فلمن اشكو ان كانت شكواى منك

من سيكون عزائى ان احزننى حبك

سؤال حائر

متى يعود الربيع ؟

متى يضحك الزهر مع ابتسامة وجهك البديع ؟

مهما تاخر فجرك سأنتظره فأملى لن يضيع !


من تخاريفى القديمه
.

الاثنين، أبريل 05، 2010

مـش وحـشانـى


غايبه عنى ومجننانى

مش عارف اقولك ايه

حتى كلمة وحشانى

ضاقت على مشاعرى

مابقتش مكفيانى

القمر السهران بيسألنى

ونجوم الليل مش سايبانى

بيستنوا السهر فى عنيكى

يغزلوا من كلامك اغانى

الليل بدونك يتيم مسكين

نفسه يسهرلك من تانى

.


الأحد، أبريل 04، 2010

قرار لاســـــــع


بعد مرور عــــام على بداية التدوين

بقيت غنى جدا وعندى 4 مدونات

وبعد ما اتسرق من 3 موضوعات

واتعلمت اكتب اخيب قصص و حكايات

وبقالى اصحاب غاليين صبيان وبنات

بيقولوا كلام كبيرعليا فى كل التعليقات

ولان الوقت قليل والعافيه درجات

قررنا ماهو ات

هنغلق كل المدونات

...................

ونكتب كل حاجه فى تخاريفنا المشكله

خواطر وهموم مصريه وامثال شعبيه

حتى دليل المدونات

كله عدى وفات

وهتفضل بس تخاريف مشكله

تشكيله اخر جنان لكل الموضوعات

.

الخميس، مارس 25، 2010

عشاق الليل - اعادة نشر

عشاق الليل

سهرانيــن

سايبين النوم لاهله

والسهر هديه

للى يستاهله

عاشقين نجوم الليل

مع صوت غنا المواويل

والقمر يندهله

فى كل مسا ياجميل

اقولك ..تسهر على خير

تقولى ...وانت من اهله

.

الأربعاء، مارس 17، 2010

بحـــــر الصفـــا - من رباعياتى


جايلك يابحــر الصفا ارمى طــن هــمــوم

جايلك وليلى شتا وكــــــل سمايــا غـــيوم

عشمان الاقى الدفا وارجع قلبى مغســــول

اتارى رملك شايب وموجك حزين مهموم

.

السبت، مارس 13، 2010

استماره بخمسه وسبعين

انا استماره بطاقه رقم قومى بس من الغالى بخمسه وسبعين جنيه لونى اخضر...قصتى بتبتدى من اول ماكنت ورقه ماسواش شلن بقدرة

قادر بقيت اساوى كتير طالعه من المطبعه فرحانه بلونى الاخضر وبتمنى الغالى بس كل ده مش مهم انا قصة حياتى القصيره بتبتدى لما حد

يشترينى ويحررنى من حبسة الخزنه وريحة الفلوس القديمهواخيرا انفتح باب الخزنه وجه دورى اخيرا الحريه ومع اول ضوء دخل الفضول

غلبنى اشوف مين هيشترينى...ودى كانت أول صدمه..اصل اللى كان فى خيالى ان كل اللى بيشترى استماره بخمسه وسبعين غنى وظروفه

مرتاحه لكن الواقع غير كده خالص اغلب اللى بيشترى استماره ب75 غلابه وعلى قد حالهم زى صابرطبعا اكيد عرفتوا مين صابر...شاب

اسمر مش مهم شكله لانه واحد من ملايين يمكن يكون جارك او اخوك اوصديقك هو شبههم وشبهك والهم اللى شايله زى همهم وهمك ..لكن

رغم انى كنت اتمنى يشترينى حد غيره ظروفه احسن لكن ماعرفش ليه تعاطفت معاه وتمنيت اسعده لما اتحول من استماره لبطاقه واصبح

كل همى هو صابر..مسكنى صابر بايده وعينه بتلقى بنظرة وداع على الخمسه وسبعين جنيه اللى اختفت فى الخزنه الضلمهماحدش عارف

هى رايحه فين حتى الموظف اللى اخدها من صابر مايعرفش مصيرها وماحدش بيقول ويمكن ماحدش سأل..مسك صابر قلمه وبدأ يكتب

بياناته بحرص شديد كأنه فى لجنة امتحان اسئلته السهله جدا خايف يجاوب عليها.رغم ان السؤال هو اسمك لكن القلم خايف يجاوب خايف

يكتب خانه غلط تبوظ الاستماره وتضيع الفلوس ..ما اصعبه امتحان.. لكن صابر طول عمره مجتهد وذكى ومتفوق موس مذاكره زى

مابيقولوا ومعاه شهاده عاليه. بدا يكتب اسمه صابر واسم ابوه راضى جنسيته مصرى تاريخ ميلاده لسه فى عز شبابه عود اخضر طاقه

منتجه عنوانه جيراننا . طبعا الحاله الاجتماعيه اعزب... اما المهنه هى اللى حيرتنى عايز يكتب عامل اجرى !! والله صعبان على يا صابر

وصعبان علي تعبك وسهرك الليالى فى المذاكره ودعوات اهلك بالنجاح عملتلك ايه الشهاده اخرتها عامل اجرى! بس كله يهون علشان لقمة

العيش .خلاص صابر كتب كل البيانات المطلوبه بدقه بس اللى محيرنى لغاية دلوقتى نظرة صابر مش مبسوط بس مش زعلان. ماعندوش

امل بس مش يائس باختصار تقدروا تقولوا عليه صابربس مش راضىاصل صابر عقبال عندكم جميعا جايله عقد عمل فى دوله عربيه

يشتغل عامل اجرى وباع اللى وراه واللى قدامه علشان يجيب العقد.... بس هو كان نفسه يشتغل فى بلده بفلوس قليله مش مشكله بس يشتغل

المهنه اللى بيحبها واللى علشانها ذاكر وتعب واخد بكالوريوس التربيه كان نفسه يشتغل مدرس تاريخالطابور طويل الدنيا حر واخيرا وصل

صابر للموظف اللى استلم منه الاستماره حسيت ان دى لحظة الفراق هتبتدى رحلتى بس من غير صابر بس اللى مصبرنى ان صابر وهو

ماشى اخد حته منى مكتوب عليها ايصال استلام لسه فيه حاجه بتربطنى بيه ...مشى صابر والموظف حطنى وسط كوم استمارات كلهم

اعرفهم كنا مع بعض فى خزنه واحده تقريبا كلنا دفعه واحده شبه بعض بس اختلفنا لما باعونا كل واحده مننا شايله هم غير اختها وبيانات

مختلفه الشبه الوحيد اللى فاضل بيننا ان كلنا محبطين من اللى شوفناه كلنا صعبان علينا اللى اشترانا كلنا بنتمنى نتحول بطاقه باقصى سرعه

وده حقنا لاننا استمارات مستعجله ...بس مستعجله على ايه....ده اول تعليق سمعته من اول موظف مسك مجموعة الاستمارات وقال لزميله

خد دى استمارات مستعجله هو قالها على انها دعابه بس احنا مستعجلين على مصالح اصحابنا ومهمومين بهمهم تعرف ياصابر كان

المفروض يسمونا استمارات مهمه لان اسم مستعجله مش بيثير اهتمام الموظف لان احنا فعلا استمارات مهمه.. مصير ناس كتير متعلق بينا

تعرف كمان المفروض يسمونا استمارات غاليه لان تمنا غالى جدا بالنسبه للفئه اللى بتشتريناتمنا بيمثل ثروه بالنسبه للغلابه اللى زى

حالاتك....انت تعرف رغم كل ده بيسمونا ايه ؟ استمارات خضرا...... احنا المفروض نطالب بتغيير اسمنا يسمونا استماره مهمه مستعجله

غاليه مهمومه

.

السبت، مارس 06، 2010

فدان حب - من رباعياتى

زرعت فـدان حـب فى ارض الكراهـيه

شـلت اشـواك الجـفا وسـقـيته دمـع عنيا

حصدت احلـى حـــب اديـتـه لكـل النــاس

ورحت اخد نصيبى اشواكه جرحت ايديا

.

الأحد، فبراير 28، 2010

هاتى ايدك



هاتى ايدك تغير خريطة كفوفى

هاتيها تمحى كل همى وخوفى

هاتى ايدك وخدى فى قلبى مكان

هاتيها تكتب نهايه لرحلة الحرمان

هاتى ايدك محتا ج احس الامان

هاتيها فرحة عيد تغلب الاحزان

هاتى ايدك لونى حلمى البعيد

هاتيها يصبح حلم العمر بالالوان

هاتى ايدك فى بكره مية مشوار

هاتيها تسند قلبى فى اى اختيار


من تخاريف زمان

.

الثلاثاء، فبراير 23، 2010

خليه يعيش

سيبه يعيش

ادعيله يفرح

بلاش تكون

انت المه

او ايد بتجرح

بلاش يحس بحبك

او يلاقيك

فى كل مطرح

سيبه ينسى حنانك

قول لقلبه

الماضى روح

شيل عيونك من طريقه

بلاش تقول الشعر فيه

سيب ضميره يستريح

ولا يحس اللى انت فيه

.

الأحد، فبراير 14، 2010

عيد الحب

عيد القلوب

ورد وازهار

وعطر ودبدوب

اشعار تتقال

وحبيب بيدوب

قالوا فى الامثال

وعد ومكتوب

قالوا فى الموال

غالب ومغلوب

عيد الحبايب

والكل دايب

وقلب يسهر

مع قلب صاحب

وقلب يحلم

بقلب غايب

اقول واعيد

فى احلى عيد

ده عيد لقلبك

وقلب حبك

اتمنى دايما

يكون سعيد

ولا عمرى اشوفه

وحيد فى عيد

.

الخميس، فبراير 11، 2010

كله من اسامه



اسامه ده يبقى صديقى فى الشغل اشترى كلب صغير وكان عاوز يفسحه فطلب منى

الطوق عشان لسه ماشتراش واحد-وطبعا لانه عارف انى من هواه تربيه الكلاب يبقى لازم عندى طوق

ولانى باحترم حق الكلاب فى الفسحه اعطيته له



ما علينا

يوم الجمعه يوم اجازه وعشان من حق كلبى انه يتفسح كان اخويا رايح يمارس هوايته فى صيد السمك


اخد معاه كلبى -ركن العربيه فى مكان قريب من مكان الصيد واندمج فى الصيد

بعد شويه كلبى زهق ورجع يلعب جنب العربيه

الدنيا ضلمت والجو سقعرجع اخويا ولما وصل عندالعربيه....يالها من فاجعه...الكلب مش موجود..واخويا اتاخر

كلمته-ايه الاخبار كفايه كده

-انا راجع بس فيه صدمه


- خير؟


- مش لاقى الكلب

- ازااااااااااااااااى؟


-بقالى نص ساعه بدور عليه وسألت الناس فيه قالولى ان عربيه حمرا عدت وكان فيها كلب ابيض

وناس تانى قالوا كان فيه كلب ابيض بيجرى ناحيه الميه

-خلاص ارجع ونشوف الموضوع ده


ووصل البيت من غير الكلب مكنتش مصدقه ان الكلب خلاص ضاع


اللى معندوهش هوايه تربيه الكلاب يبطل ضحك


بعد كذا ساعه وكانت حوالى الساعه 11 ليلا قلت لاخويا تعالى نلف لفه حوالين المنطقه ندور على الكلب


-طيب الصبح عشان الدنيا ضلمه وبرد


-لا


-طيب نتعشى ونروح


-لا


-مش هنلاقيه دلوقتى


-هو هيلاقينا


-اوك


نزلنا ومشينا على اقل من مهلنا -وندى كلاكسات-وننادى عليه-مافيش


والدنيا برد -وفتحنا الشبابيك- وانا عماله اقول لنفسى ياترى هنلاقيه؟ ياترى عامل ايه؟ وهو متدلع ومش


واخد على البهدله والمكان ضلمه خالص وبرد تلج فى اليوم ده وفجأه....وسط كلاكسات العربيه سمعنا صوت كلب


ولكن.....مش هو


وبعد شويه قبل ما افقد الامل سمعنا صوت مجموعه كلاب ولكن...مكنش معاهم


وبعد كام خطوه لقينا صوت زى حصان بيجرى ورانا.........ايه ده ......ده هو...هو


.......الحمدلله لاقانا اخيرا


وركب العربيه


ساعتها كان نفسى افهم لغه الكلاب


لانه قعد يعمل اصوات كانه بيلوم اخويا انه سابه ..مع انه هو اللى راح يلعب بعيد ..


اكيد كان فرحان انه وصل بيته بالسلامه


ويمكن يكون حس بفرحتنا احنا كمان


دى قصه حقيقيه...بس .........................كله من اسامه

.

الثلاثاء، فبراير 02، 2010

ارجو ان تحافظي على عينىّ اللتين معك


ارجو ان تحافظي على عينىّ اللتين معك

يحكى عن فتاة عمياء كانت تعيش فى احدى القرى الصغيره وكانت تحب شابا وسيما بصوره كبيره جدا.
كانت قصة حبهما مليئه بالغرام والشغف الشديد ولكن العقبه الوحيد التى واجهتهما ان الفتاه لم تستطع رؤية
حبيبها بعينيها فكانت تقول له انها ستتزوجه اذا استطاعت ان تراه بعينيها .
فى يوم من الايام جاء شخص وتبرع بعيونه لهذه الفتاة الحزينه
وبعد العمليه اصبحت قادره على الرؤيه ورجع نظرها اليها ولأول مره استطاعت ان ترى الذى احبته واحبها
ولكن سرعان ما صعقت وخابت كل آمالها واسودت الدنيا فى عينيها لتكتشف ان حبيبها شخص اعمى
لا يرى شيئا فتقدم حبيبها اليهاوسألها قائلا (هل ترغبين الزواج منىبعدما ابصرت ؟؟
وبكل برود رفضت الفتاة عرض الزواج منه ..........
فابتسم الشاب وهو يقول لها
**
**
**
**
**
ارجو ان تحافظى على عينىّ اللتين معك
القصه اكيد رمزيه لكنها بتحمل معانى ودروس مستفاده كتييير
لكن هسيبلكم النهايه انتوا تحكموا وتختاروا النهايه المناسبه

الأحد، يناير 31، 2010

قال على رأى المثل

مدونه جديده بنطرح فيها امثالنا الشعبيه للنقاش
http://amsaal.blogspot.com

التورته دى مش للمدونه الجديده التورته دى بمناسبة عيد ميلاد تومى

عيد ميلاد سعيد وعقبال 300 سنه

.

الأربعاء، يناير 27، 2010

خايف ترجعيلى



انا خايف ترجعيلى

كام مره توجعينى

خايف حبك يجيبك

ومن تانى اخسرك

وتقررى تنسينى

انا خايف اوحشك

ومن تانى اسمعك

وانتى بتحبينى

انا خايف تندهينى

اجرى عليكى بحنينى

الاقيكى بتبعدينى

انا خايف من عنادك

اكتر من خوف بعادك

خايف من جرح تانى

بكره مستنينى

انا خايف توجعينى

واتمنى ترجعيلى
.
.

الخميس، يناير 21، 2010

سماح


سامحينى واسامحك

دى ملامحى فى ملامحك

عاتبينى واعاتبك

ده اللى تاعبنى تاعبك

واجهينى واواجهك

ده مواجعى فى مواجعك

واللى واجعنى واجعك

لكن مين الغلطان

مين اللى ناسى زمان

مين اللى حالف يبعد

يروح ابعد مكان

ياللى بايعنى انهارده

بكره تلاقى اللى بايعك

بكره يدور الزمان

وتسامحينى واسامحك

.

السبت، يناير 16، 2010

صوره وتعليق



الخميس، يناير 07، 2010

العيد


كل سنه ومصر طيبه

لالالالالالالالالالالالالالالا

كل سنه والعالم كله طيب ...........

عشان الملايكه قالت المجد لله فىالاعالى

وعلى الارض السلام وبالناس المسره..........
يارب السلام يعم العالم كله والناس كلها تبقى مسروره
كل سنه وكلنا طيبين

الأحد، يناير 03، 2010

اقعدوا بالعافيه


اعتذر عن عدم متابعتكم الفتره اللى فاتت نظرا لظروف السفر

.