طق حنك مش اكتر

الخميس، فبراير 11، 2010

كله من اسامه



اسامه ده يبقى صديقى فى الشغل اشترى كلب صغير وكان عاوز يفسحه فطلب منى

الطوق عشان لسه ماشتراش واحد-وطبعا لانه عارف انى من هواه تربيه الكلاب يبقى لازم عندى طوق

ولانى باحترم حق الكلاب فى الفسحه اعطيته له



ما علينا

يوم الجمعه يوم اجازه وعشان من حق كلبى انه يتفسح كان اخويا رايح يمارس هوايته فى صيد السمك


اخد معاه كلبى -ركن العربيه فى مكان قريب من مكان الصيد واندمج فى الصيد

بعد شويه كلبى زهق ورجع يلعب جنب العربيه

الدنيا ضلمت والجو سقعرجع اخويا ولما وصل عندالعربيه....يالها من فاجعه...الكلب مش موجود..واخويا اتاخر

كلمته-ايه الاخبار كفايه كده

-انا راجع بس فيه صدمه


- خير؟


- مش لاقى الكلب

- ازااااااااااااااااى؟


-بقالى نص ساعه بدور عليه وسألت الناس فيه قالولى ان عربيه حمرا عدت وكان فيها كلب ابيض

وناس تانى قالوا كان فيه كلب ابيض بيجرى ناحيه الميه

-خلاص ارجع ونشوف الموضوع ده


ووصل البيت من غير الكلب مكنتش مصدقه ان الكلب خلاص ضاع


اللى معندوهش هوايه تربيه الكلاب يبطل ضحك


بعد كذا ساعه وكانت حوالى الساعه 11 ليلا قلت لاخويا تعالى نلف لفه حوالين المنطقه ندور على الكلب


-طيب الصبح عشان الدنيا ضلمه وبرد


-لا


-طيب نتعشى ونروح


-لا


-مش هنلاقيه دلوقتى


-هو هيلاقينا


-اوك


نزلنا ومشينا على اقل من مهلنا -وندى كلاكسات-وننادى عليه-مافيش


والدنيا برد -وفتحنا الشبابيك- وانا عماله اقول لنفسى ياترى هنلاقيه؟ ياترى عامل ايه؟ وهو متدلع ومش


واخد على البهدله والمكان ضلمه خالص وبرد تلج فى اليوم ده وفجأه....وسط كلاكسات العربيه سمعنا صوت كلب


ولكن.....مش هو


وبعد شويه قبل ما افقد الامل سمعنا صوت مجموعه كلاب ولكن...مكنش معاهم


وبعد كام خطوه لقينا صوت زى حصان بيجرى ورانا.........ايه ده ......ده هو...هو


.......الحمدلله لاقانا اخيرا


وركب العربيه


ساعتها كان نفسى افهم لغه الكلاب


لانه قعد يعمل اصوات كانه بيلوم اخويا انه سابه ..مع انه هو اللى راح يلعب بعيد ..


اكيد كان فرحان انه وصل بيته بالسلامه


ويمكن يكون حس بفرحتنا احنا كمان


دى قصه حقيقيه...بس .........................كله من اسامه

.

هناك 39 تعليقًا:

لاسع افندى يقول...

طيب كويس انه رجع بالسلامه
تخيلى ايه مصير المسكين لو كان تاه
كان بقى من كلاب الشوارع وكان هيبيع فل فى الاشارات علشان يعرف يعيش ولا كان ممكن حد يخطفه ويعلمه التسول
او حتى يشم كله

قطعتى كلبى


تحياتى

AHMED SAMIR يقول...

سبحااااااااااان الله
فعلا ربنا قادر على كل شيء
طفل صغير لو ضاع ممكن جدا ما يرجعش...و كلب لو ضاع ممكن جدا يرجع
حمدا لله على السلامة

مهموهة أحمد يقول...

طبعا تربية الكلاب دي حرية شخصية

بس ديننا ما يأمرش بكده
لانه حرام و حرام يكون في نفس البيت اللي احنا فيه
لان الملايكة ما بتدخلش بيت فيه كلاب و اكيد تعرفوا كده

المهم --- فيها ايه لو ربينا يتيم و هو اولى باللقمة من الكلب

على الاقل بني ادم مش حيوان
ايوة طبعا الحيوان محتاج للعطف و بناخد ثواب على معاملته بس مش يعيش معانا
لان لو كده كان زمان ربنا خلقنا زيهم او خلقهم زينا
بس ربنا فرق بينا و بينهم

يبقى الانسان اولى من الحيوان

عذرا معلش دي وجهة نظر و اتمنى تعتبريها نصيحة

و اكيد انتي حرة
ربنا يهدينا جميعا يا رب

كلام عيب يقول...

طيب و الله انا كنت هاعيط
انا اه مش بحب الكلاب و لا تربيتهم
بس متخيله ارتباط انسان بالكلب بتاعه
الواحد لو ضاع منه سلسه مفاتيح غاليه عليه هايزعل
ما بالك بكائن رباه و ارتبط بوجوده و فاهم اشاراته و وجوده شيئ مهم فى حياته
هيه فى الاخر روح
و ناس دخلت النار فى قطه و ناس دخلت الجنه فى كلب
و فيه حديث ما معناه ان اللى يأكل او يشرب كائن حى له فيه ثواب
حمدلله على السلامه و ده المهم
اه عجبنى الاصرار فى الوقت المتأخر ده على انك تلاقيه

Baskouta يقول...

انا عارفة احساسك
احنا كان عندنا كلبة
اه هي مكنتش عايشة معانا في البيت
لانها كانت في المزرعة بتاعتنا بس كنا بنروح المزرعة كل ويك اند وكنا مرتبطين بيها وبنحبها وهي كمان
لدرجة اننا كنا فاكرين اننا لما نديها الساندويتشات بتاعتنا او العصير احنا كدة بنقولها اننا بنحبها رغم انها كان ليها اكلها
كانت بتلعب معانا ومتسيبناش طول اليوم
ولما عملت حادثة واتعورت كلنا ( اقصد انا واخويا وولاد عمي ) زعلنا عليها جدا ...انا مقدرة احساس انك تقلقي وتتخضي عليه
وماتديش الطوق تاني لحد
حمدالله على السلامة

مي يقول...

طب والله صعب عليا اوى
وانتى بتحكى ان الجو برد
وعارفين مدى التعلق بالكلب لانه روح ملهاش ذنب فى الاخر
الحمد لله انكم لقيتوه
تحياتى ياقمر

rony يقول...

بجد بجد كنت هزعل لو تاه
وبدل ما نحكى ونقول كان فى مره كلب خطف حتة لحمه من المطبخ 000000000
كنا هنحكى عن يوم فسحة كلب
يا عينى عليه
تصدقى انا لما بتأخر بره محدش بيعبرنى
ولا يقولى انتى فين
لالالالالالالا بجد انا صعبت عليا
عموما الف حمدالله على سلامته وربنا ما يغيبه تانى يا رب
مش هوصيكى تاخدى الطوق من اسامه
مش كل ما تنزلوا تتفسحوا يتوه الغلبان ده وتنزلوا فى البرد يا حرام
وهو طبعا طبعا ممعهوش غطا ولا فلوس علشان ياكل ويبقى زى الكلاب اللقيطه
بس اقولك تبقى تبخريه وتعمليله حفله بمناسبة رجوعه بالسلامه وتتبرعى لمتضررى السيول



بااااااااااااااااااى

خواطر شابة يقول...

افهم شعورك وأقدره لكن انا يمنعني من تربية كلب هذا الحديث : مَنْ أمْسَكَ كَلْباً فَإنَّهُ يَنْقُصُ كُلَّ يَوْمٍ مِنْ عَمَلِهِ قِيرَاطٌ إِلاَّ كَلْبَ حَرْثٍ أوْ مَاشِيَةٍ. رواه البخاري وهو انا كام قيراط أجر بعمل في اليوم ده انا بالكلب حأروح جهنم حذف ههههههه

فرفشة الوان يقول...

القصة خالتني اجيب علبة مناديل تاني

حد عايزمنديل

Ms Venus يقول...

حسيت اوى بالموقف


حمدلله على سلامته

غير معرف يقول...

ههههههههههه

معلش حصل خير

المهم انه رجع

Pink Dreams يقول...

الحمد لله انك لاقيتيه يا قمر

تحياتى

mony يقول...

سلامه كلبك من التقطيع

mony يقول...

A.SAMIR
مش كل مره تسلم الجره
ممكن طبعا مكنش يرجع
الله يسلمك
منورنى

mony يقول...

الوفيه للابد
شكرا لنصيحتك
بس عاوزه اقولك
صحيح انا بربى الكلاب لانى بحبهم ولما بيكبروا بيحرسوا بيتى صحيح الحارس ربنا
لكن الكلاب وظيفتها الاولى الحراسه
زى بالظبط اللى بيربى حمار عشان يشغله
واللى بيربى بقره بيستخدمها برضه
واللى بيربى طيور ....الخ
مش لازم اربى حاجه عشان استفيد منها
مع ان الكلب بيفيدنى فى حراسته
لكن بيفيدنى اكتر فى وفاؤه
عارفه يا مها..ممكن تربى يتيم وبعدين
يعض الايد اللى اتمدته ..لكن الكلب لا اعتقد..
دا اصلا فيه اولاد من دم الانسان ولحمه ممكن يخونوه
منورانى

mony يقول...

كلام عيب
انا بحب الكلاب ومش بفكر انى بعمل فيه خير لان ببساطه دى هوايتى
زى اللى بيربى سمك او عصافير او خيل
عارفه
مره ضاعت منى نضاره غاليه وكنت بحبها جدا
بس الكائن الحى غير الجماد
شكرا لأحساسك بى

Tears يقول...

بالرغم انى مش بحب تربيه الحيوانات الاليفة و مش عارفه ليه اصلا بقرف اوى...و يادوب بستحمل بعض البنى آدمين

بس حسيت جدا بكلماتك و كنت زعلانه جدا على الكلب و بتمنى تلاقيه عشان حرام لانه اخد علي البيت و اخدتوا عليه و ده كائن فى النهاية ضعيف و مسكين و اخلاقه احسن من بشر كتير اوى

حمدلله على سلامة الكلب و اعلمى ان اهتمامك بالكلب و حبك للحيوانات الاليفة ما هو الا دليل رقى و حساسية مشاعر لان من يشعر بالكائن الضعيف الذى لا يتكلم مثلنا بالتاكيد انسان ذو حس رفيع

بس على فكرة انا مش فاهمة ايه علاقة الطوق اللى فى رقبه الكلب بالخروج و هل ده شىء للزينه و لا مكتوب فيه معلومات مثلا ممكن تساعدك لو تاهه؟

تحياتى

mony يقول...

BASKOUTA
هعمل بنصيحتك .
منورانى دايما

mony يقول...

مى
لما الواحد يكون مربى حيوان
بيحس انه واحد من العيله
مش عارفه ليه الناس بتقدر القطط
والكلاب لا
نورتينى

mony يقول...

رونى
على فكره انتى معندكيش فكره لما رجع البيت نااااااااام نوم عميق جدا
ده اكبر دليل على انه حاسس باطمئنان قد ايه
...لك حق تصعبى على نفسك...

mony يقول...

خواطر شابه
بعدالشر عليكى من جنهم
ياقمره
منورانى

mony يقول...

فرفشه الوان
هههههههههههها
شكرا لمشاعرك الجميله
وشكرا لزيارتك النبيله

mony يقول...

MS.VENUS
شكرا لمشاعرك المرهفه
سعدت بزيارتك

mony يقول...

STAR IN THE SKY
طبعا انا سعيده جدا
مش عشانى بس
لكن عشانه اكتر
الانسان نساى بعد شويه هنساه وهجيب واحد غيره بس هو ممكن ماينسانيش
تصورى

mony يقول...

PINK DREAMS
شكرا ياسكره

mony يقول...

TEARS
شكرا على ذوقك
علاقه الطوق بالموضوع انه كان مفروض يتمسك منه
بس عشان كلبى مش بيبعد عننا اخده اخويا من غير الطوق بالسلسله

Cute Kitty **sookra يقول...

حمدالله على سلامته
ههههههههههههههههههههه

Cute Kitty **sookra يقول...

حمدالله على سلامته
ههههههههههههههههههههه

mony يقول...

SOOKRA
الله يسلمك ياسكره

غير معرف يقول...

انا اصلا مبحبش الكلاب

يلا حمدلله على سلامته

just waiting يقول...

انا بترعب من اي حاجة ماشية على اربع رجلين واكتر حاجه الكلاب والقطط مش قادرة احس بالموقف اعذريني

حـــلـــم كـــان يقول...

الحمد لله على سلامه الكلب

والله كنت هزعل لو كان ضاع

بس عجبنى تشبهك كلبك بالحصان

مهو مش اى كلب

أحمد زاهر يقول...

حمدالله على سلامته
دا بس تلاقيه عينه زاغت فراح يتسلى واتأخر

MaNoOoSh يقول...

الكلاب بترتبط بالانسان جدا والعكس كمان صحيح

كان لينا قريب مربي كلاب كتير قوي
وأتذكر ان من حزنهم عليه بعد وفاته رفضو الأكل تماما وماتو بعده بفترة قصير جدا

كويس انكم لقيتو الكلب أو هو لقاكم

mony يقول...

حنين
الله يسلمك
نورتينى

mony يقول...

just waiting
عذراكى قوى
جربتى تربى عصافير او اى كائن حى ؟
لو جربتى هتحسى بى

mony يقول...

حلم كان
شكرا شكرا
هو فعلا مش اى كلب
بالنسبه لى طبعا
نورتينى

mony يقول...

ابن الخطاب
مش كده برضه
منورنى

mony يقول...

MaNoOoSh
فيه حالات كتير اعرفهم
كلابهم ماتت زعل على اصحابهم
اصل من اهم صفات الكلاب الوفاء
نورتينى