طق حنك مش اكتر

الأربعاء، يونيو 03، 2009

شهاده مميكنه

ياصباح العكننه
عايزين شهاده مميكنه
هو انا بقدم فى الحربيه
ولا الثانويه الجويه
دى يدوبك كجى وان
ياوليه كفايه زن
اروح لمين واقول يامين
اكتب اذن ساعه
ولااعمل جواب تأمين؟
بص لى المدير بحنيه
وقال لو رايح الاحوال المدنيه
اسبوع اجازه شويه
ومتنساش السندوتشات والزمزميه
واسال مجرب ياعنيا
اول يوم توقف الطابور
تقدم طلبك لما يجى عليك الدور
تانى يوم نعيد الطابور
تاخد شهاده مش مظبوطه
اغلب كلماتها مغلوطه
الذكر عاملينه انثى
وطماطم كاتبينها اوطه
علشان تصحح انسى
دورلك على مخطوطه
فيها تاريخ الاسره
او روح محكمة الاسره
هات قسيمه جواز جدك
وشهادة تطعيم حماتك
والدبلوم من عمك
وتجنيد اخواتك
واحكى تاريخ حياتك
وارجع من تانى طابور
واستنى يجيلك الدور
هتلاقى الشعر الابيض
فوق راسك منشور
وابنك قرب يتخرج
وانت واقف فى طابور
ولا طوابير الجمعيه
ومخك اتلحس وبقيت مهلبيه
علشان كده عملوا الاحوال المدنيه
فى حى العباسيه

هناك 36 تعليقًا:

norahaty يقول...

(علشان كده عملوا
الاحوال المدنيه
فى حى العباسيه)
لا حول ولا قوة
الا بالله العلىّ
العظيم:( :(

بـراااح يقول...

شوف يا أخ لاسع
يا دايس عالمواجع
و قول للي سامع
و اللي رايح او راجع
طوابيرنا دي شئ لازم
في حياتنا اليومية
اصل اللي بييجي بالساهل
مبنشوفلوش اهمية
لازم نتعب و نعاني
علي حته ورقة ممضية
يا تاخد ورقك و تمشي
يا تقلب مهلبية
و كتر خير اللي فكر
و بني الاحوال المدنية
في حي العباسية
....
تحياتي علي كلماتك القوية الساخرة و اتمني لك دوام الابداع

رؤية يقول...

اااه انت هاتقولى على الاحوال المدنية
ولا المهازل اللى بتحصل دية
دا انا من الواقفة تعبت رجلية

معلش
اصبر
يمكن
مصلحتك
تتقضى
يمكن...!

تحياتى

ايمان روحي يقول...

هههههههههههه
جد تسلم اناملك
بس ياعيني
الابن هيتخرج
وهو لسه في الطابور
تحيـــاتي

(Joudy) يقول...

هههههههه هو احنا ايه غير شوية طوابير فوق بعضيها وأهم منها اننا عندنا اصرار هنعديها يعنى هنعديها ونفضل فى الطبور وقفين فى الدور مستنين واحد فى أخره وسط ملاين من الورق يتعطف ويرد علينا ويقولنا تعالى بكره وتانى يوم نفس الحكاية وأدينا بنقضى حياتنا كده هنقول ايه دنيا وأدينا بنعشها

دمت ودامت أبتسامتك

عاشقة الأحزان يقول...

السلام عليكم



ههههههههههههههه


تسلم ايديك بجد

كلامك عسل

وهموووووووووت من الضحك

يالهووى

ربنا يبارك فيك

انوسه

الأمير يقول...

بسم الله ..

اول زياره
اول تعليق
اول كلمه
هقولك

رائع

بحب اوى الموضوع الساخر الحزين
اللى تحتار تعمل ايه وانت بتقرأه
يا ترى تعيط ..؟ ولا .. تموت على نفسك من الضحك

انت بقى عملت الاتنين بكلماتك
فرأيتها ابداع
رغم الكلمات البسيطه الدارجه
بجد
سعيد بزياتى لمدونتك
فتشرفت بك مرتين
الاولى
عندما قمت بزيارتك لمدونتى المتواضعه
الثانيه
عندما زرت انا مدونتك الطيبه الجميله

لن تكون اخر زياره بإذن الله

تحياتى لك اخى

والسلام عليكم ..؛؛

جارة القمر يقول...

الشقاء خلق لنا

التعب وراء لقمة العيش


سباق الآخرين من اجل العيش


رائع جدا ماناقشته

شكرا

سمكه واحده يقول...

(تحياتي تو)

mony يقول...

امال ياسمين كانت بتغنى لمين لما قالت:المصريين اهمه حيويه وعزم وهمه..لما ناخد شهاده الميلادبالساهل كده يبقى فين الحيويه والعزم .نسيب لمين الكفاح فى سبيل الحياه

غروب يقول...

هههههههههههه

حلوه اوى

هو ده فعلا الحال

بس عجبتنى اوى ان الكلمات مغلوطه والطكاطم بقت اوطه دى
هههههههههههه

تحياتى

Ramy Wasel يقول...

اذن لنذهب جميعا الى العبايه

ونغنى الاغنيه المهووسه

ما ما جنونه

ما ما جنونه

للعسيلى ابن المهبوله

مدونه جميله
وسأكون متابع بأذن الله
تحياتى
رامى واصل

لاسع افندى يقول...

norahaty

شكرا على مرورك والتعليق

لاسع افندى يقول...

بـراااح

احنا مانقدرش نعيش من غير طوابير
الواحد فينا لو راح مصلحه مالقاش طابور يفتكر اليوم اجازه

شكرا على كلماتك الرقيقه

لاسع افندى يقول...

رؤية

كلامك بيقول ان ليكى تجربه معاهم
كلنا لها

شكرا على المرور والتعليق

لاسع افندى يقول...

ايمان روحي

ده فيه ناس بتموت فى الطوابير وناس بتتولد


شكرا على المرور ولاتعليق واتمنى دوام الزياره

لاسع افندى يقول...

(Joudy)

هههههههههههه
هو البنى ادم ايه غير شويه طوابير ورا بعض

شكرا على التعليق واتمنى دوام المرور

لاسع افندى يقول...

عاشقة الأحزان

دايما بترفعى معنوياتى يارب ماتحرمش من تعليقاتك

تحياتى

لاسع افندى يقول...

الأمير

انت بجد امير وكلامك كله زوق واتمنى دوام الصداقه

تحياتى

لاسع افندى يقول...

جارة القمر
شكرا على المرور والتعليق واتمنى دوام الزياره واحب انتهز الفرصه واحيكى على موضوعك الملاك واقولك مبروك التاج


تحياتى

لاسع افندى يقول...

سمكه واحده
موضوعك الضرب على القفا شفا تحفه خافى عليه من السرقه


شكرا على التعليق واتمنى دوام المرور

لاسع افندى يقول...

غروب
مش بس الطماطم والاوطه ده كلها بتبقى مغلوطه


على فكره عجبتنى جدا التماثيل بتاعتك

شكرا على التعليق ودايما منوره مدونتى

لاسع افندى يقول...

Ramy Wasel

انا كنت عندك ولسه واخد علقة حب بس موضوع جميل جدا

شكرا على التعليق واتمنى دوام المرور

لاسع افندى يقول...

مونى
اخيرا عبرتينى بتعليق
وحشتنا موضوعاتك بلاش كسل ومستنين تخاريفك وخلى شهادات الميلاد عليا انا اوقف الطابور بدالك

تامر علي يقول...

أول زيارة :)

أسجل اعجابي وتقديري

والمرة الجاية اجيب الزمزمية والسندوتشات واقعد :)))

تحياتي :)

د/عرفه يقول...

أول زيارة ليا
هنا

وفعلا عجبنى الموضوع


ويارب دايما كده

تحياتى

بسنت صلاح الدين يقول...

معلش كلنا لها ،و بعدين اتقى الله بقى ،يعنى عاوز تدخل كده و تطلع علطول بشهادتك من غير بهدله ولا حاجه؟ و لا تسمع فوت بكره ولا حتى فوت بعد شهر؟،يبقى انت اكيد مش فى مصر

MaNoOoSh يقول...

ياااااااااااااااارب ما تحوجنا للطوابير أبدا وخصوصا ما كان للسجل المدنى منها


كلامك سلس وبسيط وعجبنى

هبة خميس يقول...

هههههههه
بجد تحفة جدا
معلش يا لاسع استحمل بقى هتعمل ايه
قول حسبي الله و نعم الوكيل

:)

لاسع افندى يقول...

تامر علي
نورت المدونه ويارب تكون دايما متابعنا

لاسع افندى يقول...

تامر علي
عايز احييك تحيه خاصه على موضوعك الاخير
لو لم اكن.....لوددت
بجد رائع

اتمنى دوام الصداقه بيننا

لاسع افندى يقول...

د/عرفه
نورتنا فى اول زياره وانشاء الله تكون زياره دائمه
تحياتى

لاسع افندى يقول...

بسنت صلاح الدين
تعملى ايه فى الشعب المفترى عايز كل حاجه بسهوله من غير طوابير

شكرا على التعليق واتمنى دوام الزياره

لاسع افندى يقول...

MaNoOoSh
هتروحى فين من الطوابير

شكرا على المرور والتعليق واتمنى دوام الزياره

لاسع افندى يقول...

هبة خميس

احنا مستحملين هنعمل ايه

بقالك مده مانزلتيش موضوعات لعل المانع خير منتظرين موضوعاتك وشكرا على المرور

التكعيبة للتنمية الفنية و الثقافية يقول...

مهرجان النشر الجماعى الاول

تقيم التكعيبة للتنمية الفنية و الثقافية مهرجان سنوي للنشر الجماعي للقصة و القصة القصيرة و الشعر بالعامية و الفصحى، سيكون موسمه الأول هو عام 2009.

و مفهوم النشر الجماعي هو مجموعة قصصية أو مجموعة شعرية لأكثر من مؤلف بين ضفتي كتاب واحد يجمع تلك الأعمال التي سيتم اختيارها عن طريق لجنة تحكيم في كل مجال على حدا، و يتم تحديد أعضاء اللجنة لكل دورة مهرجان.
و يصدر بتلك الأعمال مطبوع/ كتابين أحدهما للقصة و الآخر للشعر سيتم نشره في عامه الأول بالتعاون مع دار دَون، و يتم توزيعه و بيعه في الأسواق
لمساعدة الكتاب أصحاب العمل الواحد و كذا الكتاب الجدد الذين لم تتكون لديهم مجموعة قصصية أو شعرية بعد، في نشر أعمالهم المميزة بدون مقابل مادى

و ترسل الأعمال مرفق بها اسم الكاتب، عنوانه,رقم تليفونه,ايميله، وظيفته، سنه، سابقة نشره للعمل المقدم من عدمه او فوز العمل فى اى مسابقات ادبية
و ذلك في رسالة إلكترونية معنونه باسم المجال الذي يريد المشاركة في مسابقته مرفق بالرسالة العمل بصيغة وورد، و يفضل أن تكون تلك الأعمال مسجلة باسم أصحابها لكنه ليس شرطا لقبول العمل

ترسل الاعمال على ايميل
nashrgama3y@gmail.com

لمزيد من المعلومات حول المهرجان
http://eltak3eiba.blogspot.com
او
http://www.facebook.com/group.php?gid=94334335985#/group.php?gid=94334335985

مزيد من المعلومات حول التكعيبة
http://www.facebook.com/groups.php?ref=sb#/group.php?gid=29491316206

ملاحظات :
الاعمال المشاركة بالمهرجان هى فقط التى ترسل عبر الايميل او تسلم باليد
مسموح بالاشتراك بأكثر من عمل فى اى مجال
اخر موعد لتلقى الاعمال 15-7-2009

مع تمنياتنا للجميع بفرصة عادلة فى النشر
احمد حسن
0193953620
رقم محمول داخل جمهورية مصر العربية