طق حنك مش اكتر

الثلاثاء، يونيو 30، 2009

خايف من يوم وداعك


خايف من يوم وداعك

لما تشيلى سنينى

فى شنطة السفر

لما تاخدى القمر

وتسيبى ليل وسهر

ويبقى ليلى عتمه

من غير ضى القمر

خايف من يوم ضياعك

تاخدى كل اشعارى

ويفضل قلمى وحيد

يرفض يطاوعنى

ولا يكتب كلام جديد

ويبقى سطرى وحيد

والحرف بايعنى

خايف من يوم وداعك

المح فى عينك حنين

او دمعه من اوجاعك

ندمانه على السنين

تغطى فرحتك

وضحكتك

ويبان قلبك حزين

خايف على قلبك

مايكونش فيه قلبى

خايف على قلبى

مايكونش فيه قلبك

خايف على القلبين

يحنوا ليوم زمان

كانوا قلب واحد

مقسوم على جسمين
.
.

هناك 27 تعليقًا:

mohamed ghalia يقول...

إحساسك عالى قوى فى الخواطر
ربنا يسعدك دايما

لاسع افندى يقول...

مش معقول انت بجد بتبهرنى بنشاطك وتواجدك فى كل المدونات واتمنى يجمعنا مشروع مشترك


تحياتى

النسر المهاجر يقول...

الكلمات جميلة جدا والمدونة رائعة
بارك الله فيك

MaNoOoSh يقول...

كلمات جميلة قوي وفيها احساس جميل

وربنا ما يحكم على حد بلحظة الوداع دي أبدا.

رؤية يقول...

ما تخافش
ما تخافش
ماتخافش

ان شاء الله مايكونش فى وداع

تحياتى

غير معرف يقول...

إيه الإبداع ده كله
والإحساس فيها عالي عالي

وعجبتني أكتر الجزئية دي
,,,
خايف من يوم ضياعك
تاخدى كل اشعارى
ويفضل قلمى وحيد
يرفض يطاوعنى
ولا يكتب كلام جديد
ويبقى سطرى وحيد
والحرف بايعنى

,,,,

لأن فعلا يوم مالقلب يبقي وحيد القلم كمان بيبقي سجين الوحدة ويرفض ينطق بكلمة

حقيقي إسلوبك ممتع في قرايته

إستمر
تحياتي لقلمك المبدع

شمس النهار يقول...

كل ده عشان انا مسافره:):):)

بجد كلامك جميل جدا انا فعلا مش بأحب السفر والاالوداع

عطش الصبار يقول...

اول زياره لمدونتك
كلمات جميله معبره ربنا يرجع كل مسافر بالسلامه
تقبل تحياتى

منــار فايد يقول...

قلب واحد مقسوم على جسمين
جميله اوي

البوست المره دي رائع فعلا
استمر.......

شكرا
منار فايد

Sweet Violet يقول...

الوداع احساس صعب بجد v_v

بس سيبك انت
رغم حزن الخاطرة الا انها جميلة
^_^

الأمير يقول...

بجد رااائع جداا

بس جرب تغير كلمة جسمين بجسدين
جرب وانطقها بصوت مسموع كده

اعتقد جسدين اجمل من جسمين

تحيتى

marwa يقول...

ماشاء الله احساسك عالي قوي وأسلوبك في قمة الجمال والتلقائية

ربنا يفرحك دايما وتستمر حالة السعادة والابداع اللي عندك

بالتوفيق دايما

mony يقول...

انت خايف لما تكون سهران الدنيا تضلم عليك؟
اوعى تكون بتخاف من الضلمه احسن يطلعلك عفاريت زى اللى فى المحطه
حلوه "تشيلى سنينى فى شنطه السفر"
هى الشنطه هتكفى ايه وللا ايه
وبعدين ماهو قلمك مش مطاوعك هو انت بتكتب بيه حتى امر واحد؟
عموما حلوه اوى والبركه فى السهر والسفر

(Joudy) يقول...

جميلة حقيقى واحساس حلو حقيقى بجد ومن غير مجاملات

دمت بكل الخير

جحا المصرى يقول...

رائع بجد وحشنى أوى الكتابة الراقية
دمت بكل الود

واحد يعرفك يقول...

احسنت لكن هناك بعض الهنات العروضية
وواضح انك فى البدايات لكن جميل جدا ولازم تحضر ندوات ولقاءات عشان تحتك بناس اكتر وتقرا اكتر وتسمع اكتر فتتألق اكتر

لكن صورك جميلة وعندك رؤية كويسة

Haytham Alsayes يقول...

حلوة وجميلة ربنا يكرمك

جلال كمال الجربانى يقول...

السلام عليكم

كلمات جميله وأديبه

ومدونتك جميله وتستحق الزياره


ودمت بخير

المتبهدلون في الأرض يقول...

حلويه جوي

جارة القمر يقول...

أصعب احساس وأقساه هو الوداع يميت قلوبنا بلحظة

فيلوح مغادرا تاركا خلفه فراغ بحجم الكون واكثر


لا تقلق ودع الغد يرسم نفسه

!!! عارفة ... مش عارف ليه يقول...

الموضوع جميل

ومكتوب حلو اوووي

وفيه صراع بين الحبيب والمحبوبه

وبين الحبيب وذاته


تحياتي
وليد

Qatarat Nada يقول...

ما شاء الله عليك
الكلمات بسيطة اوى
بس ليها معنى حلووووو اوووى
تسلم ايدك

The illusionist يقول...

تحفه البوست ده
دى اول مره ليا
بس كانت حلوه جدا
اول مره اعدى عليك
واكيد مش اخر مره

بزنس تعيش يقول...

لما تاخدى القمر
وتسيبى ليل وسهر
ويبقى ليلى عتمة
من غير ضى القمر
هذا المقطع شديد الجمال
يعبر بصدق عن الاغتراب الوجودى
للمحب حينما يفقد حبييبته والهدف الذى يحيا لاجله
------------------------------
أنت فى مرحلة الفعل الشعرى المجدد
---------------------------------
مع تحياتى / هانى عمر

موناليزا يقول...

له حق يخاف
لان مفيش حاجة بتفضل على حالها

EMMY BABY يقول...

اجمل حاجة فيها احساسها

بجد احساسك بالحب باين فى كل كلماتك

خايف على القلبين
يحنوا ليوم زمان
كانوا قلب واحد
مقسوم على جسمين

صعب اوى حد ينسى الحب اللى وصل لدرجة قلب واحد

تحياتى

ايمى

rony يقول...

ما تخافش من الوداع ده زيه زى شكة الدبوس